Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев кӑшӑлвирус анализне пӗр вӑхӑтра 7 талӑкран пуҫласа 15 кун таран кӗтме тивнине пӗлтернӗ. Ҫын сывалсан та вӑл тепӗр икӗ эрне пульницӑра вырӑн йышӑннине, ӗҫе тухайманнине палӑртнӑ.
«Мана «Химпром» гендиректорӗ хаклӑ 20 специалиста ӗҫре кӗтсе илейменнине, тахҫанах сипленнӗ хыҫҫӑн та вӗсем инфекци уйрӑмӗнче тытӑнса тӑнине пӑшӑрханса пӗлтерчӗ. Ыйтӑвӗ ҫакӑнта пулнӑ. Санэпидцентр хӑвачӗ кунне 400 анализ тума май панӑ, ӑна кунне 600 пурнӑҫланӑ, анчах Сывлӑх сыхлав министерствин 6 лабораторийӗнчен кунсерен 1000 анализ ҫитнӗ. Паллах, ӗлкӗреймен. Ҫав вӑхӑтрах СПИД центрӗн тата кожвендиспансерӑн оборудованийӗ анализа тӗрӗс пурнӑҫлама май панӑ, вӗсене ҫӗнӗрен тӗрӗслемесен те юранӑ. Медучреждение анализсем хӑвӑртрах ҫитме пуҫласанах сипленнӗ пациентсен шучӗ хӑвӑрт ӳснӗ. Ятарлӑ пульницӑсемсӗр пуҫне республикӑн Сывлӑх сыхлав министерстви йывӑр мар чирлисене килте сипленме май туса парать. Ҫавӑнпа та цифрӑсене улталаса кӑтартман», – ӑнлантарнӑ Олег Николаев Александр Белов журналиста.
«Сывлӑх сыхлав министерствин кӑсӑклӑ арифметики: кирлӗ кӑтартӑва талӑкра епле ҫитесси». Ҫакӑн пек ятпа «Ҫыхӑнура» формура пичетленӗ материалта республикӑн Сывлӑх сыхлав министерствин ҫӗртме уйӑхӗн 16-мӗшӗнчи кӑшӑлируспа ҫыхӑннӑ оперативлӑ информацине тишкернӗ.
Асӑннӑ ведомство ӗнентернӗ тӑрӑх, пушӑ койка фончӗ талӑкра 25,1 процентран 67,9 процента ҫитнӗ. Пушӑ койкӑсен фончӗ 50 процентран пысӑкрах пулсан республика чару мерисене ҫемӗҫтерме пултарать. Пирӗн тӑрӑхра ҫапла тума шӑпах ҫав кӑтарту кансӗрлет те. Чару мерисене пӑрахӑҫлассин пӗрремӗш тапхӑрне пирӗн республикӑра ҫӗртме уйӑхӗн 21-мӗшӗнче (ун чухне Медицина ӗҫченӗсен кунӗ) куҫасшӑн.
Форум журналисчӗсем шухӑшланӑ тӑрӑх, 67,9 процент вӑл — 413 койка. Кӑшӑлвируслисем валли 1663 койка пӑхса хӑварнӑ-ҫке. Ҫӗртмен 15-мӗшӗнче 153 койка ҫеҫ (25,1%) пушӑ пулнӑ. Талӑкра 260 вырӑн пушаннӑ. 85 ҫынна пульницӑран кӑларни паллӑ-ха. Ҫапах та тепӗр 175 вырӑн кирлӗ. Апла пулсан е ҫӗнӗ койкӑсем хатӗрленӗ, е чирлисене сывалса ҫитме киле ӑсатнӑ. Маларах ЧР сывлӑх сыхлав министрӗ Владимир Степанов пациентсен 80 ытла проценчӗ пульницӑра тухтӑрсен пулӑшӑвӗ кирлӗренех выртать тенӗ.
Кӑшӑлвирус сарӑлнине хирӗҫ сарӑлнине ӗҫлекен республикӑри оперштаб паян черетлӗ ларӑва пуҫтарӑннӑ. Ӑна Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев ертсе пынӑ. Унта кӑшӑлвирус анализӗсене вӑрах вӑхӑт туни пирки те сӑмах хускатнӑ.
Олег Николаев каланӑтӑрӑх, лабораторисен ӗҫӗнче тата анализ кӗтессинче йӗрке тумалла. Ҫапла хушнӑ вӑл Чӑваш Ен Сывлӑх сыхлав министерствине таиа Роспотребнадзор управленине.
«Соцсетьсене тишкернӗ тӑрӑх, анализсене ҫичӗ кун таран кӗтметивет. Ҫакна чир чӑтса ирттернӗ манӑн ӗҫтеш, Лекарев Сергей Николаевич (сӑмах республикӑн промышленность министрӗн ҫумӗ пирки пырать. Т.Т.), та ҫирӗплетсе пачӗ. Вӑл анализ панӑ хыҫҫӑн кӑтартӑва ултӑ кун кӗтсе больница хучӗпе ларнӑ. Тепӗр майлӑ каласан, сывӑ ҫын ултӑ кун анализ хатӗр пулассине кӗтсе ларнӑ», – тенӗ республика ертӳҫи.
Паян, ҫӗртме уйӑхӗн 10-мӗшӗнче, Чӑваш Ен Министрсен Кабинечӗн ларӑвӗнче республикӑн Сывлӑх сыхлав министерствине протоколсем ҫырма ирӗк пама йышӑннӑ. Кунта сӑмах административлӑ майпа саккуна пӑсакансем пирки пырать. Тата тӗрӗсрех каласан, чрезвычайлӑ лару-тӑру саманинче е ҫав саманана ҫывӑх чухне.
ЧР Сывлӑх сыхлав министерствин специалисчӗсем Административлӑ майпа саккуна пӑсни ҫинчен калакан кодексӗн 20.6.1 статйипе килӗшӳллӗн протоколсем ҫырма тытӑнӗҫ. Кӑшӑлвируспа чирлине пӗлсе тӑрсах йӗркене пӑхӑнманнисене, чирлисене те, вӗсемпе хутшӑннисене те, пырса тивӗ ҫакӑ. Протокол ҫырсан айӑплисене штрафлама та юрать.
| ҪӖР | 05 |
Чӑваш Ен прокуратури хушша-хуппа кӗнӗ хыҫҫӑн репсубликӑри тухтӑрсене 39 миллион тенкӗ ытла хушса тӳлемелле тунӑ.
Надзор органӗн пресс-службинче пӗлтернӗ тӑрӑх, республика прокуратури сывлӑх сыхлав учрежденийӗсен ӗҫченӗсене хавхалантармалли укҫана епле тӳленине тӗрӗсленӗ. Тӳлев йӗркине пӑснӑ май укҫана сахалтарах куҫарса пани ҫиеле тухнӑ.
Кӑлтӑка тупса палӑртнӑ хыҫҫӑн прокуратура медицина организацийӗсене тата республикӑн Сывлӑх сыхлав министерствине асӑрхаттару хучӗсем ҫырса панӑ, унта вӑл ҫитменлӗхе пӗтермеллине палӑртнӑ.
Пульница ӗҫченӗсене укҫана ҫӗнӗрен шутласа панӑ хыҫҫӑн 3192 тухтӑра 39,7 миллион тенкӗ ытларах тӳлеме йышӑннӑ. Вӑл «кӗмӗле» шурӑ халатлисем шалупа пӗрле илӗҫ.
Пирӗн республикӑра вертолет лапамӗсем тӑвӗҫ тата вертолетсем туянӗҫ. 2024 ҫул тӗлне Чӑваш Енри 30-тан кая мар пациента пульницӑна вертолетпа илсе ҫитерӗҫ. Вертолет туянма федераци хыснинчен 30 миллион тенкӗ уйӑрнӑ ӗнтӗ.
Чӑваш Ене 5 медицина округне пайланӑ. Ҫурҫӗр медицина округӗнче — III шайри суран центрӗсем; Анӑҫ, Тӗп, Кӑнтӑр-Хӗвеланӑҫ тата Кӑнтӑр-Хӗвелтухӑҫ округӗсенче – II шайри суран центрӗсем. Кашни округра вертолет лапамӗсем пулӗҫ.
Чӑваш Ен Мари Элпа юнашар. Ҫавна май унти пациентсен пӗр пайне Шупашкара илсе килес шухӑшлӑ. Ҫакӑ вертолетпа усӑ курнин тата ӑна тытса тӑнин тӑкакне чакарма май парӗ.
Авиамедицина бригадисем валли сертификатлӑ 8 специалист пур, пурӗ 12 ҫынна вӗрентсе кӑларнӑ. 20-е яхӑн ҫынна авиамедицина енӗпе ятарлӑ пӗлӳ парӗҫ.
Мускава пысӑк шалу шыраса тухса кайнӑ тухтӑрсем Чӑваш Ене таврӑннӑ. Юлашки ҫулсенче медицина сестрисем те йышлӑн кайрӗҫ. Кайнисенчен чылайӑшӗ паян та ҫӗршывӑн тӗп хулинче тӗпленсе пурӑнать. Ҫапах та тӑван тӑрӑха таврӑнакансем пур-мӗн. Кун пирки Чӑваш Ен сывлӑх сыхлав министрӗ Владимир Степанов паян ЧР Правительство ҫуртӗнче иртнӗ ларура каланӑ.
Стратегиле аталанӑвӑн тата проект ӗҫӗпе тимлекен канаш лаврӑвӗнче медицина отраслӗнчи кадрсен ыйтӑвне те хускатнӑ. Владимир Степанов ӗнентернӗ тӑрӑх, пуш уйӑхӗ хыҫҫӑн Мускавран 13 онкологпа 2 кардиолог таврӑннӑ. Ҫав вӑхӑтрах хамӑр тӑрӑхри ҫулланнӑ тухтӑрсем кӑшӑлвирус ересрен шкиленнипе е отпуска кайнӑ, е лару-тӑру лайӑхланиччен килте ларма кӑмӑл тунӑ.
Улатӑрти ача ҫуратмалли уйрӑма хупма йышӑннӑ. Анчах вӑхӑтлӑха. Кӑшӑлвирус лару-тӑрӑвӗ лайӑхлансанах ӑна каллех уҫӗҫ. Ҫапла пӗлтернӗ Чӑваш Ен Сывлӑх сыхлав министерствинче. Ача ҫуратмалли уйрӑмра ковид центрӗ пулӗ.
Улатӑрти пульницӑн ача ҫуратмалли уйрӑмӗнче эрнесерен 3-4 хӗрарӑм ҫеҫ ҫӑмӑлланать иккен. Ҫав вӑхӑтрах кӑшӑлвиурспа чирлекенсем йышлӑ. Хӗрарӑмсен консультацине хупмӗҫ. Йывӑр хӗрарӑмсене вӑл унчченхиллех йышӑнӗ. Ача кӗтекенсене васкавлӑ пулӑшу кирлӗ пулсан хирурги уйрӑмӗнче йышӑнӗҫ. Унта вӗсем валли икӗ койка-вырӑн пӑхса хӑварнӑ. Гинекологи чирӗпе аптӑракансене валли те унтах йышӑнӗҫ. Вӗсем валли 4 койка-вырӑн пур.
Ача ҫуратакансене Ҫӗмӗрлене пульницӑн транспорчӗпе илсе кайӗҫ.
Чӑваш Енре пурӑнакан, кӑшӑлвирус диагнозӗ ҫирӗпленнӗ тата тепӗр ҫын вилнӗ. Чӑваш халӑх сайчӗ ун пеккисен йышӗ 10 ҫын тесе хыпарланӑччӗ-ха. Ҫу уйӑхӗн 23-мӗшӗнче чӗре тата пӳре чирӗпе нушаланакан 74 ҫулти арҫын Йӗпреҫ район пульницинче пурнӑҫран уйрӑлнӑччӗ.
Чӑваш Ен Сывлӑх сыхлав министерствинче ҫу уйӑхӗн 24-мӗшӗ тӗлне тата тепӗр ҫын вилнине ӗнер пӗлтернӗ. Ҫапла вара пирӗн регионта кӑшӑлвирус диагнозне ҫирӗплетнисем 11-ӗн пурнӑҫран уйрӑлнӑ. Хальхи пациент та ҫамрӑк мар. Вӑл 81 ҫулта пулнӑ. Ӑна Шупашкарти васкавлӑ медицина пулӑшӑвӗн пульницине ҫу уйӑхӗн 23-мӗшӗнче вырттарнӑ. Арҫын виҫҫӗмӗш стадири юн пусӑмӗн тата пуҫ мимин чирӗсемпе чирленӗ.
Чӑваш ЕН Сывлӑх сыхлав министерствине пӑхӑнса тӑракан лабораторисенче ҫу уйӑхӗн 16-мӗшӗ тӗлне кӑшӑлвирус анализне 20 пин те 4 хутчен тунӑ. Талӑкра 524 анализ ирттернӗ.
Шупашкарти венерологи диспансерӗнчи лабораторире 428 анализ пурнӑҫланӑ, Республикӑн клиника пульницинче — 96.
Пӗтӗмпе 17 пин те 855 ҫынна тӗрӗсленӗ.
Гигиенӑпа эпидемиологи центрӗнче ҫу уйӑхӗн 16-мӗшӗнчи ирпе 687 ҫынна тӗрӗсленине пӗлтернӗ.
Федерацин айӑплава пурнӑҫа кӗртес енӗпе ӗҫлекен службӑн республикӑри управленийӗнче те кӑшӑлвируса тӗрӗслекен лаборатори ӗҫлесе кайнӑ. Унта ҫу уйӑхӗн 16-мӗшӗнч ир тӗлне 93 ҫыннӑн анализне илнӗ. Федерацин Травматологи, ортопеди тата эндопротезировани центрнче 52 ҫынӑнне 59 анализ илнӗ.
+16.3 °C